mesa sectorial do 21 de febreiro

A CIG-Ensino lamenta que non se nos mandase por correo electrónico a oferta de emprego e a documentación que se nos entregou hoxe nesta Mesa para poder ter feito un estudo e valoración. Botamos en falta que a oferta de emprego non forme parte negociación das condicións de traballo e estabilidade do profesorado interino, cando ademais había o compromiso de iniciar esta negociación a finais de xaneiro ou comezos de febreiro. A oferta debe garantir a estabilidade dos interinos, a redución das ratios e o incremento das plantillas dos centros para facer fronte ao fracaso escolar. Botamos en falta prazas de Psicoloxía e Pedagoxía para dotar de máis dun Orientador aos centros de máis de 12 unidades. Reclamamos medidas concretas na convocatoria para evitar situacións irregulares en determinadas especialidades dos Conservatorios e para que se cubran as prazas. En canto aos opositores con discapacidades, é necesario contactar con eles para ver que discapacidade teñen e, polo tanto, que adaptacións materiais, temporais, etc. necesitan.

A Administración responde que non é unha oferta pechada e que van deixar un prazo de dous días para que se fagan aportacións, pero o núcleo central da oferta vaise manter. Non se fai oferta máis ampla porque consideran que o novo Decreto derivado da LOE vai favorecer o acceso dos interinos. En Música de secundaria a oferta non é maior porque está pendente a posibilidade de convocar cátedras. Tiveron tamén en conta para a oferta que as prazas do 1º ciclo de ESO vacantes van ser ocupadas por profesorado de Secundaria. A oferta ampla de prazas de Inglés de Primaria, responde á intención da Consellaría de incrementar a oferta de idiomas e iso non pon en perigo a situación dos interinos.

En canto ás prazas para discapacitados buscarase a maior información posíbel sen atentar contra o dereito á intimidade, para darlles as facilidades que necesiten. Haberá a máxima colaboración por parte da Administración.

Como a LOE seguramente se aprobará aproximadamente en abril, o profesorado provisional, interino e substituto de Primaria xa non poderá elexir vacantes do 1º ciclo da ESO. Neste momento hai 56 interinos e menos de 400 provisionais impartindo en ESO (a Adicional non conta para  PT e AL).

Rogos e preguntas:

CIG:

-É necesario estabelecer un calendario de temas a tratar nesta Mesa, priorizando o tema do acordo de estabilidade dos interinos, retribucións, mellora da gratificación por xubilación, etc...

-Preguntamos se a Xunta vai presentar recurso contra o Decreto de Centros Integrados porque van rematar os prazos. Está habendo conflitividade nalgún centro pola incertidume actual da situación do profesorado ao non coñeceren a futura tipoloxía para os Centros Integrados.

-Demandamos solución para o profesorado de Canto dos Conservatorios que ten que impartir idomas, sen ter esta especialidade.

-En relación co Decreto de elección de directores, é necesario prever algún mecanismo por se os prazos da LOE non permiten sacar un novo Decreto.

-Estase negociando a modificación da Lei da Función Pública. Urxiría unha circular no ensino, mentres non estea rematada a negociación, que permitira a acumulación da hora de lactancia ao permiso por maternidade, como xa se está fecendo noutros colectivos

-Solicitamos, tal como xa temos presentado ao servizo de formación do profesorado, que o profesorado que está en prazas do exterior e remata este curso, poida optar a prazas de asesores de CEFORES aínda que neste momento non sexa funcionario da Consellaría de Educación.

-O tema das ratios e condicións de traballo do profesorado de Infantil debería ser tratado nesta Mesa Sectorial.

Admón.:

-Unha vez rematada a oferta de emprego e a convocatoria de oposicións presentarase un calendario de temas a negociar na Mesa.

-Traerán unha proposta á Mesa a respecto do Decreto de directores o mes que vén. Non teñen aínda unha decisión tomada.

-A regulamentación da lactancia depende de normativa básica e non se pode resolver cunha circular, aínda que van estudar o tema.

Incorpórase o Director Xeral de FP para dar resposta ás cuestións relacionadas con FP.

-Non hai problema en facernos chegar os datos de matrícula de FP: 33.000 alumnos matriculados e 15.000 prazas sen cubrir.

-Neste momento hai 4 centros que teñen redución horaria para mantemento das redes informáticas; no resto depende da dispoñibilidade horaria do profesorado.

-Centros Integrados: Aínda non teñen informe por escrito dos servizos xurídicos para ver se se vai presentar recurso ao Decreto de Centros Integrados. O único aspecto recurríbel é a tipoloxía de centros. A opinión da Consellaría é que nos Centros Integrados non haxa ESO pero si Bacharelato. No mes de marzo haberá unha Mesa Sectorial para tratar os Centros Integrados e para o reformulamento de todo o mapa de FP. Están pensando nunha rede de 12 Centros Integrados dependentes da Consellaría de Educación, nos que van estar representadas entre 15 e 18 familias profesionais. En 4 destes centros non vai haber ESO; noutros 4 a matrícula é inferior a 80 alumnos; noutros 2 é inferior a 140-160; no caso do IES de Fene hai que buscar unha solución específica (desde a CIG apuntamos que a solución vai ser dividilo administrativamente en 2 e o director Xeral non o nega); e haberá un Centro Integrado de nova creación en Lugo capital.