INSPECTORES EDUCATIVOS PRETENDEN IMPEDIR A APLICACIÓN DO ACORDO ASINADO O 8 DE XUÑO POLA CIG-ENSINO E OUTRAS ORGANIZACIÓNS SINDICAIS QUE AMPLÍA OS CADROS DE PROFESORADO DOS CENTROS DE INFANTIL E PRIMARIA E REDUCE A XORNADA LECTIVA DESTE PROFESORADO

Como é sabido, a CIG-ENSINO e outras organizacións sindicais chegaron a un acordo coa Consellaría de Educación, o día 8 de xuño, para mellorar os cadros de persoal dos centros docentes de primaria e infantil e para reducir o horario lectivo e de permanencia fixa nos centros.

Este acordo, á parte doutras cuestións, estabelece, taxativamente, que para o inicio deste curso escolar (2007-2008) o horario fixo de permanencia semanal do profesorado será de 25 horas en lugar das 30 h. e de 21 h. lectivas en lugar das 25 h. para aplicar entre este curso e o que vén. O mesmo acordo recolle: “A Consellaría de Educación e Ordenación Universitaria comprométese a garantir os recursos necesarios para facer efectivo este horario mantendo unha efectiva organización do centro”.

Porén, a CIG-ENSINO vén de constatar que a inspección educativa está dando instrucións aos centros escolares de infantil e primaria para que non se aplique o acordo asinado o día 8 de xuño de 2007 pola CIG-ENSINO e outras organizacións sindicais sobre o incremento dos cadros de persoal e horario do profesorado.

É inxustificábel que, a poucos días de iniciarse o curso, a Consellaría non teña dado instrucións aos centros para a aplicación do acordo tal e como lle solicitara xa, no seu día, a CIG-ENSINO. Pero o que é máis grave é que diferentes inspectores educativos pretendan impedir a súa aplicación.

Por iso, a CIG-ENSINO vén de exixir á Consellaría que dea as instrucións necesarias e garanta o profesorado suficiente para facer efectivo o acordo asinado o 8 de xuño. Ao mesmo tempo solicitamos unha reunión urxente para negociar as instrucións necesarias para aplicar os novos catálogos e horario lectivo de 21 horas.

Santiago, 5 de setembro de 2007

Secretaría de prensa da CIG-ENSINO