Ordes PIALE e reintegro de gastos de formación

1. Orde do __ de ________ de 2012, pola que se convocan prazas destinadas ao profesorado para a realización de itinerarios formativos para a mellora da súa competencia lingüística e comunicativa, relativos ao Programa Integral de Aprendizaxe de Linguas Estranxeiras (PIALE), para o ano 2012.
2. Orde do__ de_________de 2012 pola que se regula o procedemento para o reintegro individual de gastos por asistencia a actividades de formación do profesorado non universitario para o ano 2012.

1. Orde sobre Programa Integral de Aprendizaxe de Linguas Estranxeiras (PIALE), para o ano 2012.

A Admón comeza explicando que se eliminou a modalidade 1.5. por falta de demanda. 

CIG-Ensino:

A CIG-Ensino inicia a súa intervención manifestando o seu desacordo con que a convocatoria de cursos se faga de acordo cos principios ideolóxicos do PP en materia lingüística. 

Propoñemos:

Deberían eliminarse os criterios de exclusión recollidos no artigo 4º e, en todo caso, establecer prefenreicas.

Non é aceptábel que se limite a formación ás persoas que teñen nivel B2. En relación con isto propoñemos que se suprima que para poder participar haxa que ter o B1 ou B2.

Respecto dos cursos de Portugués. Seguen parecéndonos poucas as prazas de portugués, pois aínda que tiveron un incremento do 100% respecto do curso pasado, seguen sendo menos do 50% ofertado na convocatoria de 2010. Tal e como está a orde déixase fóra da formación ao profesorado que imparte portugués e non ten a especialidade, que é o profesorado de galego. 

•  Entendemos que esta formación debe poder solicitala todo o profesorado do ensino público, sexa ou non funcionario de carreira (as sentenzas que está habendo indican que non se pode facer esta diferenciación).
•  Suprimir o apartado 3.e.i.) igual có resto dos apartados que recollen como requisito ter nivel B1 e B2. A respecto do 3.e.i.) estamos en desacordo con que se esixa o compromiso de participar no Plan de seccións bilingües ou o de centros plurilingües.
•  Modalidade 2, non nos parece axeitado que esta modalidade soamente se recolla para os coordinadores e quen estea participando no Plan de seccións bilingües ou de centros plurilingües
•  No apartado c) na modalidade 3, en 3.4., 3.5. e 3.6, o que dicimos é que esta oferta ten que ser para os centros públicos. Responden que é un erro, que esta oferta só vai dirixida ao profesorado dos centros públicos.
•  Suprimir o apartado 3. d) “O profesorado ... deberá asinar o anexo VI, comprometéndose a promover a creación ou mantemento de seccións bilingües ou do programa de centros plurilingües, no seu centro de destino e a impartir docencia na lingua estranxeira da súa especialidade.”
•  De acordo co xa exposto sobre o compromiso para impartir en lingua estranxeira e sobre requisitos de acceso, reclamamos que se supriman os apartados 3 e 4 do artigo 7.
•  Art. 8, que a comisión que vai baremar teña un carácter máis técnico, sen que estean os subdirectores xerais e cun profesor ou profesora de cada especialidade.
•  No caso de desempate pensamos que no apartado b debe considerarse a puntuación do apartado 2.1. do baremo.
• Ademais da comunicación a través da web debe haber outra.
• Sobre o baremo: 

• Que a antigüidade sexa a de profesor en centros públicos, incluíndo profesorado interino.
• Na anticipación de lingua estranxeira, rebaixar a puntuación a 1,5.

• Debería haber unha oferta maior para especialistas e para portugués. 
• A diferencia do ano pasado si figura a partida orzamentaria, mais non as condicións económicas. 

A Consellaría non atende ningunha das propostas presentadas na Mesa. O Director Xeral, Mira Lema, mesmo responde que están facendo o que teñen que facer e que a realidade dálles a razón porque cada vez hai máis centros plurilingües e máis profesorado co nivel b2.

A CIG-Ensino insiste no tema de portugués e a Consellaría non nega que se houbese máis demanda (din que o ano pasado só se pediron seis prazas) poderían incrementar o número de prazas.

2. Orde para o reintegro individual de gastos por asistencia a actividades de formación do profesorado non universitario para o ano 2012.

CIG-Ensino:

En canto ao preámbulo reclamamos que se suprima a palabra “crítica”, pois xa se fala de reflexión engadir “crítica” é introducir un matiz negativo nesa reflexión. Ademais pedimos que ao final dese parágrafo se recolla: “favorecer o coñecemento da nosa realidade lingüística e sociocultural”, pois é absolutamente necesario coñecer o noso idioma e o noso contexto, co obxecto de mellorar a formación que lle damos aos nosos alumnos.

Solicitamos que no terceiro parágrafo se suprima “con independencia da ampla oferta formativa desenvolta pola Consellaría” porque é meramente propagandístico a parte de non ser certo, a propia orde existe para completar a formación que non ofrece a Consellaría.

Artigo 1.2. Ten unha dotación económica moi baixa, incrementala. Dise que é a mesma do ano pasado, si, mais o nivel de vida, o IPC o gasoil, etc. é todo máis caro, e por tanto é unha redución indirecta. Xa o ano pasado reclamamos que se incrementase, pois en 2010 foi de 90000€.

Artigo 2.1. Eliminar ao final do parágrafo “Os solicitantes non poderán percibir outro tipo de axudas para a asistencia á actividade solicitada e non poden ter recibido reintegro individual nas dúas últimas convocatorias (anos 2010 e 2011).” En todo caso habería que facer unha priorización.

Artigo 2. Destinatario todo o profesorado, tamén o interino. Como xa dixemos as sentenzas que está habendo van nese sentido e este profesorado ten que ter os mesmo dereitos pois no seu día terá que presentar as horas de formación necesarias. 

Artigo 3. Só se prevé para outras actividades que non sexan TICs e plurilingüismo se hai orzamento suficiente, que se retire esta puntualización e que se recollan tamén actividades para a normalización, transversais, pedagóxicas…  Que se elimine “ou teña interese para as necesidades do centro educativo”, porque isto é introducir de matute un obxectivo, case un requisito, pola porta de atrás.

Artigo 3.2. claro que se restrutura, se analizamos os datos desde 2009 veremos que as reducións nestas partidas son alarmantes, 

Por outro lado, non entendemos que nos PIALE se reduza a convocatoria de cursos e nesta orde se cree o apartado de formación no estranxeiro cunhas cantidades ben máis elevadas. Cal é o motivo?.

Volvemos dicir, por moi mal que lle pareza ao Director Xeral que non estamos de acordo coa comisión, integrada por cargos institucionais, ten que ser máis técnica e debe contar con presenza do profesorado.

A Consellaría non atende ningunha das propostas presentadas na Mesa. Mira Lema engade que si que a oferta é ampla e que lles gustaría que non quedasen prazas vacantes. É unha orde para axudar ao profesorado, o que vai ao exterior debe ter o máximo de axuda… Acusa ás organizacións sindicais de estarmos instaladas no discurso do recorte, cando eles o que fan é actuar con responsabilidade.

CIG-Ensino:

A administración si está instalada no discurso do plurilingüismo, mal utilizado, porque en realidade quere dicir inglés. Queren facer propaganda no DOG? Porque iso é o que están facendo. Volvemos preguntar sobre a nosa proposta de que se engada o obxectivo de favorecer coñecemento da lingua e contexto sociocultural, e seguen sen responder.